Gipasidunggan sa kagamhanan sa siyudad sa Sugbo ang Cebu City Police Office (CCPO) tungod sa ilang talagsaong kalampusan sa pagmintinar sa kalinaw ug kahapsay, human makasakmit og kapin sa ₱1.7 milyones nga gituohang shabu ug nakadakop og 55 ka personalid sulod sa 7 ka adlaw nga hugot nga anti-criminality operations.
Ang maong pag-ila gipadayag pinaagi sa Resolution No. 17-1649-2025, nga giaprobahan atol sa regular nga sesyon sa Sangguniang Panlungsod niadtong Nobyembre 25, 2025. Gipasiugda sa resolusyon nga adunay katungdanan ang lokal nga kagamhanan ug ang kapulisan sa pagpanalipod sa kaluwasan sa katawhan, sumala sa balaod.
Ubos sa pagpanguna sa Officer-in-Charge PCOL George V. Ylanan, gipakusgan sa CCPO ang ilang kampanya batok sa kriminalidad, ilabi na kontra iligal nga drogas. Gikan Nobyembre 7 hangtod 13, 2025, nagpatuman ang CCPO og mga operasyon sa tibuok soyudad nga misangpot sa pagdakop sa 51 ka personalidad nga nalambigit sa drogas ug upat (4) ka suspek tungod sa iligal nga pagdala og armas.
Sa maong panahon, nasakmit usab sa kapulisan ang gituohang shabu nga gibanabanaang kantidad nga ₱1,732,300, nga dakong kalampusan sa pagbungkag sa mga grupo sa drogas nga naghulga sa kaluwasan ilabi na sa mga kabatan-onan.
Nadakpan usab ang walo (8) ka wanted persons ug narekober ang upat ka loose firearms, nga nakapugong sa posibleng mga bayolenteng insidente sa mga barangay.
Giila sa kagamhanan nga ang kalampusan sa CCPO resulta sa disiplina, panaghiusa, ug dedikasyon sa mga pulis sa pagpanalipod sa kaayohan sa matag Sugboanon. Busa, pinasikad sa mosyon ni Hon. Paul Labra II ug gisundan ni Hon. David Tumulak, giuyonan sa konseho nga pasidunggan ang CCPO alang sa ilang epektibong operasyon.
Nagpasalamat ang Cebu City Police Office sa maong pag-ila ug mipasalig nga ipadayon ang ilang paningkamot sa pagpatuman sa balaod, pagpalig-on sa pagsalig sa komunidad, ug pagpanalipod sa kaluwasan sa tibuok Cebu City.
Source: CCPO
I via Renante Socia Lada
#rpndykccebu
#675hzamband
#tandemexpress