Gipasidunggan sa kagamhanan sa siyudad sa Cebu pinaagi sa Sangguniang Panlungsod ang Cebu City Police Office (CCPO) tungod sa malampusong pagpatuman sa Bike Patrol Program. Ang maong pag-ila gimando sa Resolution No. 17-1724-2025, nga giaprobahan atol sa regular nga sesyon sa konseho niadtong Disyembre 2, 2025.
Ang pag-ila gibase sa balaod nga nagmando nga ang Philippine National Police (PNP) kinahanglan usa ka organisasyon nga duol sa komunidad ug nakatutok sa pagserbisyo, aron masiguro ang kalinaw, kahapsay, ug kaluwasan sa katawhan.
Gilusad opisyal ang Bike Patrol Program niadtong Nobyembre 24, 2025 sa Tourist Police Office sa Cebu City ubos sa pagpanguna ni PCOL George V. Ylanan, Officer-in-Charge sa CCPO. Gitabangan kini sa Tourist Police Unit nga gipangulohan ni PMAJ Mark Don P. Leanza ug ni PLTCOL Miguel B. Andeza, Deputy City Director for Operations.
Tumong sa programa nga madugangan ang presensya sa pulis, mapadali ang ilang lihok, ug mas paspas ang pagresponde, ilabi na sa mga lugar nga daghan og turista sama sa mga landmark, parke, sentro sa negosyo, ug laaganan nga lisod sudlan sa patrol car. Pinaagi niini, mas dali makatabang ug makapanalipod ang pulis sa mga residente ug bisita, lokal man o langyaw.
Giila sa Sangguniang Panlungsod nga ang Bike Patrol Program usa ka bag-ong pamaagi sa kapulisan nga nagpalig-on sa kaluwasan sa komunidad, nagsaka sa pagsalig sa katawhan, ug naghimo sa pulis nga mas makita ug mas duolon. Gidayeg usab sa kagamhanan ang programa isip epektibong paagi sa pagpalambo sa seguridad sa mga sikat nga suruyanan sa Cebu City.
Nagpasalamat ang CCPO sa Cebu City Government ug sa Sangguniang Panlungsod sa maong pag-ila ug mipasalig nga ipadayon ang makabag-o ug komunidad-based nga pagpulis alang sa kalinaw, kaluwasan, ug pagsalig sa publiko.
Source: CCPO
I via Renante Socia Lada
#rpndykccebu
#675hzamband
#tandemexpress