Gipasidunggan sa Sangguniang Panlungsod sa siyudad sa Cebu ang Cebu City Police Office (CCPO) human malampuson nga maluwas ang 403 ka menor de edad tungod sa paglapas sa curfew ug nasikop og 9 ka personalidad nga nalambigit sa iligal nga drogas atol sa hugot nga operasyon ubos sa OPLAN BULABOG.
Ang pag-ila gipadayag pinaagi sa Resolution No. 17-1650-2025, nga giaprobahan niadtong Nobyembre 25, 2025. Gibase kini sa balaod nga nagmando sa lokal nga kagamhanan ug kapulisan sa pagpanalipod sa kaluwasan ug kaayohan sa katawhan, ilabi na sa kabatan-onan.
Ubos sa pagpanguna sa OIC PCOL George V. Ylanan, padayon nga gipakusgan sa CCPO ang ilang kampanya batok sa kriminalidad ug iligal nga drogas aron mapanalipdan ang mga batan-on ug ang tibuok komunidad. Gikan sa gabii sa Nobyembre 10 hangtod sa kadlawon sa Nobyembre 16, 2025, nagpatuman ang CCPO og sunod-sunod nga operasyon nga misangpot sa pagdakop sa 9 ka drug suspek ug pagrescue sa 403 ka menor de edad.
Atol sa mga anti-drug operation, nasakmit sa kapulisan ang 3.03 gramos sa gituohang shabu nga gibanabanaang kantidad nga ₱20,604. Ang mga nadakpan karon nag-atubang og kaso ilalom sa Comprehensive Dangerous Drugs Act of 2002. Samtang ang mga menor de edad nga naluwas gihatag dayon sa DSWD ug ubang social welfare offices alang sa hustong pag-atiman ug tabang.
Kabahin usab sa operasyon ang OPLAN BAKAL-SITA, diin gisusi sa kapulisan ang 2,250 ka establisemento aron masiguro ang pagsunod sa balaod ug ordinansa. Nakahatag usab ang CESET og 13 ka citation tickets alang sa gagmay nga paglapas sama sa panigarilyo sa publiko ug pag-ihi sa publikong lugar.
Matud ni PBGEN Redrico A. Maranan, Regional Director sa PRO7, dakong tabang ang makita ug aktibong presensya sa pulis sa pagpugong sa kriminalidad ug pagpalig-on sa pagsalig sa katawhan. Samtang mipadayag usab si PCOL Ylanan nga ipadayon sa CCPO ang maong mga operasyon aron masiguro ang kaluwasan sa matag Sugboanon.
Tungod sa maong kalampusan, pinasikad sa mosyon ni Hon. Paul Labra II ug gisundan ni Hon. David Tumulak, giuyonan sa Sangguniang Panlungsod nga pasidunggan ang CCPO tungod sa ilang propesyonalismo, disiplina, ug dedikasyon sa pag-alagad sa komunidad.
Source: CCPO
I via Renante Socia Lada
#rpndykccebu
#675hzamband
#tandemexpress