Nadakpan sa kapulisan ang duha ka indibidwal atol sa buy-bust operation nga gihimo sa Barangay Santo Niño, Cebu City niadtong Mayo 19, 2026.
Ang operasyon gipahigayon pinaagi sa hiniusang paningkamot sa Criminal Investigation and Detection Group (CIDG) Mandaue City Field Unit, CIDG Regional Field Unit 7, ug Regional Intelligence Unit 7.
Nahitabo ang operasyon sulod sa usa ka commercial building sa Plaridel Street diin nasakpan ang mga suspetsado tungod sa giingong paglapas sa Republic Act No. 7394 o Consumer Act of the Philippines. Human sa operasyon, narekober ug nasakmit sa mga otoridad ang kapin 207 ka nagkalain-laing klase sa laptop nga adunay gibanabanang kantidad nga ₱5.3 milyon.
Sa pagkakaron, anaa na sa kustodiya sa CIDG Mandaue City Field Unit ang duha ka suspetsado alang sa hustong dokumentasyon ug pagpasaka sa kaso. Wala pa’y dugang detalye nga gipagawas samtang nagpadayon pa ang imbestigasyon ug case build-up sa kapulisan.
Matod ni PNP Chief Jose Melencio C. Nartatez Jr., padayon nga palig-onon sa PNP ang ilang operasyon batok sa mga ilegal nga kalihokan aron maprotektahan ang publiko ug masiguro nga legal ug limpyo ang mga transaksyon sa merkado.
Gipasabot usab sa PNP nga ang maong operasyon kabahin sa ilang kampanya ubos sa “Bagong PNP para sa Bagong Pilipinas: Serbisyong Mabilis, Tapat at Nararamdaman,” nga nagsuporta sa direktiba ni Presidente Ferdinand R. Marcos Jr. alang sa mas lig-on nga consumer protection ug pagmintinar sa kalinaw ug kahapsay sa komunidad.
I via Renante Socia Lada