Ang Bulkang Kanlaon, nga nahimutang sa Isla sa Negros, padayon nga nagpakita og taas nga aktibidad. Sumala sa Philippine Institute of Volcanology and Seismology (PHIVOLCS), ang Alert Level 3 nagpabilin, nga nagpasabot og magmatic unrest o posibilidad sa mas kusog nga pag-erup.
Sa miaging 24 ka oras hangtod Enero 2, 2025, ang bulkan nakapakita og mosunod nga mga aktibidad: Lima ka higayon nga pagbuga og asu, nga milungtad og 5 hangtod 116 ka minutos. 27 ka volcanic earthquakes, lakip ang 9 ka volcanic tremors.
Ang PHIVOLCS nag-awhag sa publiko nga magmatngon ug likayan ang pag-adto sulod sa 6-kilometer radius Permanent Danger Zone (PDZ) tungod sa peligro sa posibleng mga pyroclastic density currents ug ashfall.
Gidasig usab ang mga Local Government Units (LGUs) nga mag-andam ug magpatuman og mga lakang aron mapanalipdan ang katawhan.
Ang mga residente sa mga dapit nga posibleng maapektuhan gidasig nga magbantay sa mga abiso gikan sa mga otoridad ug mag-andam sa posibleng pagbalhin kung kinahanglan. Ang mga airline companies gipasidan-an usab nga likayan ang pagpalupad duol sa bulkan tungod sa peligro nga dala sa volcanic ash.
Ang PHIVOLCS padayon nga nagbantay sa kahimtang sa Bulkang Kanlaon ug maghatag og mga update kon adunay kausaban sa aktibidad niini. Gidasig ang tanan nga mosubay sa opisyal nga mga pahibalo aron makalikay sa peligro nga dala sa bulkan. (Renante Socia Lada)
(Source: PHIVOLCS)