Cebu City – Mosugod karong adlawa, Martes, Nobembre 23, 2021, ang Cebu City Council committee on finance sa budget hearing alang sa 2022 annual budget nga P8.9 billion target.
Kini mas ubos ug P1.1 billion kompara sa 2021 annual budget, nga matod pa ni Konsehal Raymond Garcia, ang committee chairperson sa budget and finance, tungod kini kay mo totok lang ang administration pag gamit sa pondo alang sa importanteng gastuhan.Kuhaon ang budget gikan sa P8.74 billion general funds ug sa P1.5 billion special funds account.
Ang mga gastohan gi bahin-bahin sa mosunod:
- P3.573 billion alang sa general policy, admin, ug finance; P3.254 billion sa frontline services;
- P641.35 million sa local development;
- P567.67 million aid ngadto sa city barangays;
- P437 million alang sa reserve funds;
- P315.67 million sa debt servicing;
- P149.02 million alang sa support sa mga frontlines; ug
- P10 million sa miscellaneous ug ubang gastohan.
Labing dako nga bahin adto sa mga services ubos sa Office of the Mayor, nga dunay gi gahin nga P1.569 billion.
Naglakip kini sa P500 million alang sa senior citizens’ assistance, P36.5 million sa manpower labi na sa contact tracing; P122.5 million sa scholarship ug P30 million para sa burial assistance.
Ang Department of General Services (DGS) mi propose ug P641 million budget, samtang ang Cebu City Transportation Office (CCTO) nangayo ug P231 million budget.
Usa sa labing dako nga budget ma sukad mao ang Cebu City Health Department (CHD) nga miabot ug P773 million tungod kay apil na niini ang hiring, medicines, vaccines ug ubang health services.Miabot ug P517 million ang gi propose sa Department of Public Services (DPS), ang P408 million alang kini sa garbage collection, hauling ug disposal.
Sa ilang bahin ang Department of Social Welfare and Development (DSWS) mi propose ug P415 million alang sa social services, samtang ang Department of Engineering and Public Works (DEPW) nangayo ug P254 million alang sa infrastructure projects ug maintenance.
Laing dako nga proposed allocation sa 2022 annual budget gikan sa Disaster Risk Reduction and Management Office (DRRMO), kinsa nangayo ug P437 million nga pondo alang sa kalamidad.
Gipasabot ni Konsehal Garcia nga ang pag menus sa budget tungod kini kay ang mga departments gipahibaw nga wala lang usa niining Capital Outlay allocations o ang pagpamalit ug bag-ong mga sakyanan, furnitures, equipment ug uban pa.
“Gi-optimize nato ang budget, wa tay capital outlay, wa tay sakyanan paliton, way furniture and equipment. Ang gusto ni mayor nga mofocus ta sa sweldo, maintenance. If and when magkinahanglan gyod og equipment like ang CCMC (Cebu City Medical Center), ato nang isupplemental budget nalang,” pasabot ni Garcia.
Ning pagsugod sa budget hearings, gihangyo ni Garcia ang iyang mga kaubang konsehal pagtambong sa budget hearings aron dili malangan ang pag approved niini sama sa nahitabo niadtong 2020.
Kahinumduman nga ang 2021 annual budget napasar duha ka semana sa wala pa matapos ang 2020 gumikan sa kadaghan sa mga revisions ug ang City Council mipahigayon ug debate atol sa final readings, hinungdan nga nalangay ang budget.
Karong tuiga, naglaum si Garcia nga motambong ang mga sakop sa konseho aron ilang madungog ang tagsa tagsa ka pagpasabot sa matag department.
“Ako silang giawhag nga moattend sa budget hearing. They will see and realize and be educated on how the department arrived at their particular budgets. Didto na sila mohimo sa interpolation di kay ig approval na,” matod ni Garcia.
Gitinguha sa committee nga mahuman ang hearing sud sa duha ngadto sa tulo ka semana sa dili pa ang final budget moabot ngadto sa kinatibuk-an sa konseho sa syudad.
Source/Photo: Cebu City PIO