KUMPIYANSA si Provincial IATF Chief Dr. Jerie Calingasan uban ni Governor Bambi Emano nga sa hingpit makab-ot sa Misamis Oriental ang 70% herd immunity.
Sa gipahigayon nga vaccine survey sa matag munisipyo sa lalawigan niadtong miaging semana, nasuta nga mokabat na sa 292,166 kon 42.87% sa target population nga 681,571 ang nakadawat na sa ilang 1st dose sa COVID-19 vaccine sa tibuok probinsya samtang 57% kon 389,405 ang wala pa nabakunahan.
Nag-una ang lungsod sa Balingoan nga adunay 53.79% kon 4,560 ka indibidwal sa target population niini nga 8,478 ang nabakunahan na sa ilang 1st dose. Gisundan kini sa lungsod sa Naawan nga adunay 53.8% (8,638) ug lungsod sa Villanueva sa ilang 53.03% (16,018).
Lauman nga mosaka ang ihap sa mabakunahan human gi-anunsyo sa Provincial IATF ngadto sa katawhan pinaagi sa mga local chief executives ang katapusang duha ka semana nga kampanya sa pagbakuna ngadto sa eligible population batok COVID-19 sa 424 ka barangay nga sakop sa probinsya nga sugdan sa adlawng Lunes, Nobiyembre 15 ngadto sa adlawng Biyernes, Nobiyembre 26, ning tuig.
Giawhag karon ni Dr. Calingasan ang mga wala pa magpabakuna nga pahimuslan ang maong higayon nga gihatag kanila aron maprotektahan sa kadaot nga dala sa maong virus.
Hangyo sab karon ni Gobernador Bambi Emano sa katawhan ang ilang hugot nga kooperasyon sa kampanya sa pagbakuna sa tinguha nga sa hingpit mobalik ang pagbukas sa turismo sa lalawigan aron ang katawhan layo sa kabalaka nga mataptan sa virus.
(Source: IATF-MisOr)