Usa ka laing kalampusan sa kampanya batok sa ilegal nga drogas ang nakab-ot sa kapulisan sa Bohol, diin usa ka suspetsado nga nagpayuhot og gituhuang shabu ang nadakpan sa operasyon sa Purok 6, Brgy. Bool, Tagbilaran City, sa nakalabay na adlaw.
Giila ang suspek nga si Josh Vincent Pilotos y Pelayre, hingkod ang pangidaron, nga kasamtangan nga nagpuyo sa Purok Lansones, Brgy. Sta. Cruz Pooc, Baclayon, Bohol. Nasakmit gikan kaniya ang 265 gramos nga gituohang shabu nga nagkantidad og PHP 1,802,000.
Matod ni Bohol Gov. Erico Aris Aumentado, kini nga kalampusan nagpamatuod nga seryoso ang administrasyon sa pagpakgang sa impluwensya sa ilegal nga droga:
“Kini nga operasyon, uban sa daghan pa nilang kalampusan, nagpamatuod nga seryoso ang atong administrasyon sa paglimpyo sa komunidad batok sa impluwensya sa ilegal nga droga,” segon ni Bohol Gob. Aumentado.
Ang mga narekober nga drogas ipailalom sa pagsunog aron masiguro nga dili na kini magamit pag-usab. Padayon usab ang lokal nga gobyerno ug ang kapulisan sa ilang determinadong kampanya aron mapreserbar ang kalinaw ug kasiguruhan sa probinsya.
📸 BPPO
I via Renante Socia Lada