Gipangulohan ni PDEA-7 Regional Director Joel B. Plaza ang flag ceremony sa Bureau of Jail Management and Penology (BJMP) Region 7 kagahapong adlawa, Oktubre 20, 2025, diin iyang gipasidunggan ang buhatan tungod sa aktibong pagsuporta niini sa kampanya batok sa iligal nga drogas.
Atol sa seremonya, personal nga gihatagan ni Director Plaza og Letter of Commendation si JCSupt. Luisito Muñoz, hepe sa BJMP-7, isip pag-ila sa ilang kalampusan sa pagpatuman sa drug-free workplace program. Gipangunahan usab nila ang pag-unveil sa drug-free workplace marker nga simbolo sa ilang panumpa nga suportahan ang usa ka luwas ug limpyo nga lugar nga trabahuan.
Matod pa sa datos sa Dangerous Drugs Board (DDB) niadtong 2024, 58 porsyento sa mga tawo nga adunay substance use disorder kay empleyado, hinungdan nga importante gyud nga palig-onon ang mga programa sa paglikay sa drogas sulod sa mga opisina ug lugar sa trabaho.
Gipasabot ni Director Plaza nga padayon ang PDEA-7 sa pakig-partner sa mga ahensya sa gobyerno ug pribadong sektor aron masiguro nga ang mga trabahoan sa rehiyon mahimong drug-free ug luwas alang sa tanan.
Source: PDEA-7
I via Renante Socia Lada