Malampusong gitapos sa Cebu Provincial Government pinaagi sa Cebu Provincial Youth Development Office (CPYDO) ang Cebu Provincial Arts Month 2026 pinaagi sa usa ka makabungog nga pasundayag sa arte, kultura, ug kabag-ohan didto sa Capitol Grounds niadtong Pebrero 28.
Ang highlight sa selebrasyon mao ang unang “Bisti sa Paghiusa — Sustainable and Wearable Art Competition” nga gisalmutan sa 18 ka local government units (LGUs) sa probinsya. Gipakita dinhi ang talento sa mga batan-ong Sugboanon isip mga artista, designer, ug manunulat nga nagdala og garbo sa Sugbo.
Sa Digital Art Contest nga may temang “Hulagway sa Kamatuoran,” nadaug sa Carcar City ang People’s Choice Award samtang kampeon ang City of Naga. Nakasungkit og 1st Place ang San Francisco, gisundan sa Santa Fe sa 2nd Place, Tuburan sa 3rd Place, ug Bogo City sa 4th Place.
Sa Digital Storytelling nga may titulong “Sugilanon sa Sugbo,” nakadaog sa People’s Choice Award ug Champion ang City of Carcar. Nakuha sa Pinamungajan ang 1st Place, gisundan sa Oslob sa 2nd Place, Barili sa 3rd Place, ug City of Danao sa 4th Place.
Sa Special Awards sa Bisti sa Paghiusa, nailhan nga Best Make-Up Artist ang representante sa Argao nga si Joshua Banquil, samtang Best Model ang gikan sa Danao City nga si Eden Grace Mendez.
Sa kategoryang Best Design and Designer, nakadaog isip Grand Champion ang Oslob pinaagi sa designer nga si Christian Angelo Lambojon. Nakuha sa Tabuelan ang 1st Runner-Up samtang 2nd Runner-Up ang Argao.
Labaw pa sa usa ka kompetisyon, ang kalihokan nahimong usa ka mahinungdanong panagtigom nga nagpasidungog sa talento sa kabatan-onan ug nagpalig-on sa paningkamot sa probinsya sa pagpalambo sa creative industry sa Sugbo. Nagpabilin nga tumong sa probinsya ang pagdasig sa usa ka lig-on, mamugnaon, ug kabatan-onan nga komunidad sa Cebu.
Source: Cebu Province PIO
I via Renante Socia Lada