Malampusong gipahigayon sa Local Government Unit sa Gutalac ang lima ka adlaw nga seminar-workshop sa pagrepaso sa lokal nga bayranan ug pag-update sa Municipal Revenue Code niadtong nilabay nga adlaw sa SB Session Hall, Gutalac, Zamboanga del Norte. Gipangulohan kini ni Mayor Eddie Justin Quimbo uban sa giya sa Department of Finance pinaagi sa Bureau of Local Finance and Governance.
Tumong sa kalihokan ang pagpalig-on sa fiscal policies, pagpaayo sa revenue generation strategies, ug pagsiguro nga ang lokal nga mga regulasyon motubag sa kasamtangang kahimtang sa ekonomiya ug legal nga pamantayan. Sulod sa lima ka adlaw, nagkahiusa ang mga opisyal sa munisipyo ug mga hingtungdan nga opisina sa teknikal nga pagreview ug estratehikong pagplano.
Gisusi ug giayo ang mga importanteng probisyon sa Municipal Revenue Code aron masiguro ang sustenable, transparent, ug accountable nga pangagamhanan. Ang maong inisyatiba nagpalig-on sa institusyonal nga pagtubo ug maayong pagdumala sa panalapi isip pundasyon sa epektibong serbisyong publiko.
Nagpasalamat ang LGU kang Daniel Atilano, Secretary to the Sanggunian, sa pagpangulo sa maong kalihokan. Pinaagi sa pagrepaso sa lokal nga bayranan ug pag-update sa Revenue Code, nagpadayon ang LGU Gutalac sa paghatag og mas patas nga pagbuwis, mas maayong pagpalihok sa pondo, ug kalidad nga serbisyo alang sa tanang Gutalacnon.(JENIFFER JR. DELICA)
Source: LGU Gutalac- Public Information