Usa ka negosyante nga nagmaneho sa BMW R1300GS big bike ang namatay human kini mibangga sa usa ka Nissan Terra VL SUV nga gimaneho sa usa ka civil engineer sa kurbadahon nga dapit sa Barangay Busay, Sabado sa buntag, Agosto 23, 2025.
Giila sa Traffic Enforcement Unit (TEU) sa Cebu City Police Office ang biktima nga si Stewart Tan Chu, 57, residente sa Tuscania Condominium, Barangay Guadalupe. Siya gideklarar nga dead on arrival sa Chong Hua Hospital.
Ang nakabanggaan nga SUV giila nga gimaneho ni Engr. Jessie Sloan Lee Young, 40, taga Mandaue City, ug nakarehistro sa usa ka construction company.
Base sa inisyal nga imbestigasyon ug CCTV footage, gikan sa Transcentral Highway (TCH) ang big bike ni Chu nga nag-atubang paingon sa Busay, samtang nagdulhog ang SUV. Sa usa ka kurbadahon nga parte sa kalsada, nilapas sa pikas linya ang motorsiklo ug nakabangga sa atubangan nga wala nga bahin sa SUV. Tungod sa impact, nalabay ang motor ug nalagpot si Chu sa konkreto nga dalan, hinungdan sa iyang grabeng kadaut.
Sa opisyal nga sketchy report, giingon: “As both parties approached the curve section of the road, Party A’s motorcycle overshoot and establish collision to the front left portion of Party B’s vehicle. Due to the impact, Party A was thrown off and sustained severe injuries.”
Gidala pa ang biktima sa ospital apan napakyas ang mga doktor sa pagluwas kaniya. Samtang ang civil engineer nga drayber sa SUV gi-turnover sa TEU alang sa dugang imbestigasyon.
I via Renante Socia Lada