Gipasidungog ug giablihan sa Police Regional Office 7 (PRO-7) ang tulo ka bag-ong police stations sa mga lungsod sa Baclayon, Catigbian ug Clarin, Bohol, Agosto 28, 2025.
Ang Baclayon Police Station gitukod sa 400 sqm nga yuta nga gihatag sa LGU Baclayon, samtang ang Catigbian Police Station natukod sa 500 sqm nga yuta nga gihatag usab sa LGU Catigbian. Sa Clarin, natapos usab ang pagtukod sa ilang police station sa 400 sqm nga lote nga donasyon sa LGU Clarin.
Ang maong mga pasilidad mao ang 3-ka andana nga PNP Standard Type “BC” buildings nga gipatuman pinaagi sa pondo gikan sa General Appropriations Act (GAA) FY 2024. Ang matag usa adunay Approved Budget Contract nga nagkantidad og ₱10,551,000.
Pinangulohan ni PCOL Maribel B. Getigan sa Regional Logistics and Research and Development Division ang seremonya uban sa mga station commanders ug mga lokal nga opisyales. Mitambong usab ang mga mayor sa Clarin, Catigbian ug Baclayon, uban pa sa mga representante sa probinsya ug distrito sa Bohol.
Sa iyang mensahe, giingon ni PRO-7 Regional Director PBGEN Anthony Aberin Maranan nga ang bag-ong mga pasilidad usa ka timaan sa modernisasyon ug mas lig-on nga serbisyo publiko. Nagpasalamat usab siya sa suporta sa mga LGU nga hinungdan aron matuman ang proyekto. Matod pa niya, kini nga kooperasyon naghatag inspirasyon sa kapulisan nga mas pa lig-onon pa ang ilang pagserbisyo sa katawhan.
Source: PRO7-PIO
I via Renante Socia Lada