Nasakpan sa mga alerto nga Tourist Police ang usa ka 29-anyos nga lalaki sa Cebu Safari and Adventure Park sa Barangay Corte, Carmen, Cebu niadtong Hunyo 6, 2025, tungod sa pagdala og pusil nga walay lisensya, nga supak sa Republic Act 10591 ug sa COMELEC Gun Ban.
Nahibaw-an ang suspek human kini nagpakita og kadudahang lihok sa dihang misulod sa parke. Giimbestigahan siya sa mga guwardya ug wala kini nakapakita og permit o lisensya sa armas nga iyang gidala. Sa ilang pagsusi, nakit-an ang usa ka caliber 5.56 Frontier revolver nga may unom ka buhing bala. Gidakop siya ug gibalhin sa Carmen Municipal Police Station alang sa hustong dokumentasyon ug pagsaka og kaso.
Tungod sa paspas nga lihok ni PSSg Valeriano Butal ug Pat Reden Otom gikan sa Tourist Police Unit, malikayan ang posibleng hulga sa usa sa mga pinakasikat nga lugar sa turismo sa Sugbo. Kini nagpakita sa ilang tinuod nga katungdanan sa pagpangandam ug pagpanalipod sa mga bisita.
Matod ni PBGEN Redrico A. Maranan, Regional Director sa PRO-7, gidayeg niya ang pagka-alerto sa mga pulis sa turismo.
“The safety of both local and foreign visitors remains a top priority for us in Central Visayas. This incident highlights the preparedness and professionalism of our Tourist Police in neutralizing risks within our tourist zones. We are committed to maintaining safe, secure, and welcoming destinations for all,” matod ni PBGEN Maranan.
Nagpadayon ang Tourist Police Unit sa pagtinabangay sa lokal nga kapulisan ug mga security agency aron mapalig-on ang ilang presensya sa dagkong destinasyon sa Central Visayas. Ila kining paningkamot aron masiguro nga ang tanang turista makapahimulos sa ilang bakasyon nga luwas ug walay kabalaka.
Source: PRO7
I via Renante Socia Lada