Si Cebu Archbishop Jose Palma mipirma og Special Power of Attorney (SPA) pabor kang Cebu Governor Gwen Garcia aron tugutan siya sa paghimo og legal nga aksyon batok sa National Museum of the Philippines (NMP).
Ang maong lakang kalabot sa pagpugong sa NMP nga ibalik sa Archdiocesan Shrine of Patrocinio de Maria Santisima, o mas nailhan nga Boljoon Church, ang upat ka pulpit panels nga gikawat kaniadtong 1980s ug nahimutang karon sa NMP.
Sa usa ka press briefing nga nahitabo, Enero 13, 2025, gipahibaw ni Gob. Garcia nga ang Provincial Legal Office nag-andam na sa pagpasaka og daghang kaso batok kang NMP Director General Jeremy Barns. Apil niini mao ang paglapas sa Code of Conduct and Ethical Standards for Public Officials and Employees tungod sa iyang kakulang sa pag-atubang sa opisyal nga mga komunikasyon gikan sa Gobernador, ni Archbishop Palma, ug ni Tourism Secretary Christina Garcia Frasco.
Aduna usab silay ipasaka nga criminal charges batok kang Barns ngadto sa Office of the Ombudsman tungod sa iyang posible nga paglapas sa Anti-Fencing Law, Anti-Graft and Corrupt Practices Act, ug National Cultural Heritage Act of 2009.
Gisaysay usab ni Gov. Garcia nga ang Kapitolyo maglakip sa Anti-Fencing violation sa magtiayong Edwin ug Aileen Bautista, ang mga art collectors nga nagdonar sa maong panels ngadto sa NMP. (Renante Socia Lada)
(Source: Cebu Provincial Capitol PIO)