Patay ang usa ka 70-anyos nga amahan ug ang iyang 75-anyos nga silingan human sa brutal nga pagpangtigbas sa Barangay Luka, Lungsod sa Oslob, sa alas 5:30 sa kadlawon, Pebrero 21, 2025.
Ang mga biktima nailhan nga sila si Marciano Dinopol Dinaguit, 70 ug ang silingan niini nga si Summy Toledo Armalinto, 75, nga parehas nga molupyo sa maong lugar. Ang suspek, nga ilang silingan, nailhan nga si Randy Esparcia Dinaguit, 23.
Matod sa imbestigasyon sa Oslob Police Station, kalit lang nga nanghasi ang suspek nga nagdala og hinagiban ug nanigbas sa mga biktima. Pulos sila nakaangkon og daghang samad nga hinungdan sa ilang kamatayon.
Nasayran nga wala sa hustong panghuna-huna ang suspek sa dihang naghimo sa krimen.
Sa gabii pa lang sa Huwebes, nasuta nga nag-atang na kini og tawo aron tigbason. Dali kining girespondehan sa kapulisan sa Oslob, apan sa ilang pag-abot, misuway pang moatake ang suspek batok sa mga pulis.
Tungod niini, napusilan ang suspek apan nabuhi kini ug kasamtangang anaa sa tambalanan. Sa pagkakaron, giandam na ang kasong Parricide ug Murder batok sa suspek nga nagpaabot sa legal nga proseso sa Oslob Police Station. (Renante Socia Lada)