Napadak-an ang tulo ka mga suspek samtang 127 ka indibidwal ang natiketan atol sa Oplan Bulabog nga gipahigayon sa kapulisan sa Barangay Luz ug kasikbit nga mga barangay sa gabii sa Pebrero 20, 2025.
Pinangulohan ni PCOL Enrico E. Figueroa, Acting City Director sa Cebu City Police Office, uban ni PLTCOL Maria Theresa Macatangay, Deputy City Director for Operations, ang operasyon nakatabang sa pagdakop sa tulo ka indibidwal nga nagkupot og gituhuang shabu ug ilegal nga armas.
Gawas sa mga nadakpan, 127 ka indibidwal usab ang gitiketan tungod sa nagkalain-laing mga paglapas sa lokal nga ordinansa, sama sa public drinking, smoking, pag-ihi sa kadalanan, sayop nga paglabay og basura, ug public indecency. 23 ka menor de edad usab ang nasalbar atol sa operasyon.
Kapin sa 100 ka personnel gikan sa nagkadaiyang police units ang ningsalmot sa operasyon, nga gidunganan usab sa Barangay Public Safety Officers. Ang tumong niini mao ang pagpakusog sa presensya sa kapulisan sa kadalanan sa Cebu City aron mupugong sa kriminalidad ug ipatuman ang urban discipline.
Matud ni PCOL Figueroa, ang Oplan Bulabog nagpakita sa dedikasyon sa Cebu City Police Office sa kaluwasan sa komunidad ug epektibong pagpangpatuman sa balaod. Kini nga lakang makatabang sa paghulma sa disiplina sa mga residente ug bisita sa syudad. (Renante Socia Lada)
(Source: CCPO)