Usa ka 25-anyos nga lalaki ang namatay human kini giayo-ayo og tigbas sa iyang mismong amahan, pasado alas 10:30 kagabii, Enero 15, 2025, sa Purok Tulip, Barangay Casil, Lungsod sa Consolacion, Sugbo.
Ang biktima mao si Renato Castafares, samtang ang suspetsado nga iyang amahan nailhan nga si Ramonito Bihag, 51-anyos. Pulos sila molupyo sa nahisgutang lugar.
Sumala ni PSsg. Gemini Adalim sa Consolacion Police, ang insidente nagsugod dihang naaktohan ni Ramonito ang iyang anak nga nanghagit og away sa iyang mga menor de edad nga igsoon. Pag-abot sa amahan gikan namasahero isip habal-habal driver, iyang gibadlong ang anak. Apan, misukol kini nga niresulta sa mainit nga panag-away tali sa mag-amahan.
Matod ni Adalim, kanunay dapatan sa biktima ang iyang mga igsoon, hinungdan nga napugos ang amahan sa pagbuhat sa krimen. Gipahayag usab nga ang mag-amahan adunay daghang rekord sa barangay ug Consolacion Police tungod sa mga panagbangi ug reklamo.
Sa pagkakaron nagpadayon ang imbestigasyon sa kapulisan kalabot sa maong krimin.
📸 Consolacion PNP
I via Renante Socia Lada