“Amoang ipadayon ang kaso para dili nani mahitabo pag usab sa akong anak.”
Mao kini ang hugtanon nga desisyon ni Felixberto Villaruel, ang amahan ni Felmar “Marmar” Villaruel
atol sa pakigkita nila ni Mayor Cesar “Didoy” Suan sa iyang buhatan petsa August 7, 2024.
Sa wala pa nagkita si Marmar ug si Mayor Suan karong adlawa, una na silang nakigkita ni Lapu-lapu City Mayor Ahong Chan kansang pagtabang gidayeg gayud ni Mayor Suan.
“Makalaum ang pamilya ni Marmar sa suporta sa Munisipyo sa Cordova sa pagkab-ot nila og hustisya. Daghan kita og mga abogado lakip na ang mga abogado sa LGU Lapu-lapu nga magtambayayong para ihatag ang gikinahanglan nga legal assistance,” saysay ni Mayor Suan.
Gawas sa legal assistance, gimandoan na usab ni Mayor Suan si Municipal Health Officer Dr. Thirdy Louise Kong sa Cordova Primary Health Care Facility nga ipa konsulta si Marmar ugmang adlawa sa Vicente Sotto Memorial Medical Center (VSMMC) para sa Developmental Assessment ug Management.
Buot usab ipahibalo sa publiko ni MSWDO Head Perlito Mahinay nga si Marmar walay deperensya sa pangisip nga maoy kasagaran nga pagtoo sa mga tawo.
“Si Marmar diagnosed og Autism Spectrum Condition. Ang ASD usa ka neurological and developmental disorder that affects how people interact with others, communicate, learn, and behave,” saysay ni Mahinay.
Matud ni Mahinay nga ang ASD “is a complex developmental condition involving persistent challenges with social communication, restricted interests, and repetitive behavior.”
Sa susamang bahin, kauban sa niatubang ni Mayor Suan ang gipasanginlan nga nagdagmal kang Marmar nga si Christopher Bicada. Kuyog ni Bicada si Kalubihan, Cebu City Barangay Captain Rex Millan.
Ni-angkon hinuon si Bicada sa iyang sayop ug nangayo og pasaylo apan hugtanon gayud ang hukom sa amahan ni Marmar nga pasakaan siya og kaso nga Child Abuse ug lain pang mga reklamo nga mamahimong ipasaka kaniya.
“Ang pagpasaylo mahatag ra ka na, apan sa tanang natong gibuhat ug desisyon aning kalibutana, adunay gayuy igong sangputanan busa kinahanglan nga andam kita moatubang niini,” matud ni Mayor Suan. (Renante Socia Lada)
(Source: Cordova PIO)