Nasikop sa operasyon sa kapulisan ang usa ka 18-anyos nga giila sa alyas “Sabog” atol sa buy-bust operation nga gihimo sa mga sakop sa Mabolo Police Station 4 ubos sa pagdumala ni PLT Regalado C. Dela Victoria, Officer-in-Charge, niadtong Setyembre 27, 2025 sa Sitio San Vicente, Barangay Luz, Cebu City.
Basi sa imbestigasyon, ang suspek nailhan nga street-level drug personality nga anaa sa local drug watchlist. Gikan sa operasyon, nakumpiskar gikan sa iya ang gituohang shabu nga may gibug-aton nga 5.2 gramos nga nagkantidad og ₱35,700, buy-bust money, usa ka pitaka nga gituohang gi-container sa iligal nga drogas, ug usa ka kalibre .38 nga rebolber uban ang duha ka bala.
Tungod niini, giatubang sa suspek ang dagkong kaso lakip na ang paglapas sa Sections 5 ug 11, Article 2 sa RA 9165 o Comprehensive Dangerous Drugs Act of 2002, ug RA 10591 alang sa illegal possession of firearms.
Si PCOL Enrico Evangelista Figueroa, Acting City Director sa Cebu City Police Office (CCPO), mipadayag sa iyang pagpasalamat sa mga sakop sa Mabolo Police Station sa ilang kalampusan batok sa drogas ug kriminalidad. Iyang gisaad nga magpabilin lig-on ang kapulisan sa kampanya aron masiguro ang kalinaw ug seguridad sa dakbayan.
Source: CCPO
I via Renante Socia Lada