Nadakpan sa mga pulis sa Parian Police Station 1 ang usa ka lalaki nga giila lang sa alyas nga “Daren” atol sa buy-bust operation niadtong Pebrero 26, 2026, sa Sitio BSJCO, Barangay T. Padilla, Dakbayan sa Sugbo.
Ang operasyon gipahigayon sa Parian Police ubos sa pamuno ni PMAJ Alvino B. Enguito, kauban ang mga operatiba sa Philippine Drug Enforcement Agency (PDEA). Nadakpan ang suspetsado human siya mibaligya og gidudahang shabu ngadto sa poseur buyer.
Sa pagdakop kaniya, nakuha ang usa ka sachet sa gidudahang shabu nga gibaligya, siyam pa ka dugang nga sachet, ug usa ka belt bag nga gigamit isip sudlanan. Nakumpiskar usab ang buy-bust money nga nagkantidad og ₱12,000, lakip ang usa ka tinuod nga ₱500 nga bill ug mga marked nga kwarta.
Sumala sa mga awtoridad, mokabat sa 50 gramos ang gibug-aton sa nakuhang gidudahang shabu nga adunay estimated value nga P340,000 base sa standard drug price. Ang tanang ebidensya gidala sa Cebu City Forensic Unit alang sa laboratory examination.
Gipahibalo ang suspetsado sa iyang mga katungod sumala sa balaod ug karon anaa sa kustodiya sa Parian Police samtang ginahimo ang pagpasaka sa angay nga kaso batok kaniya.
Source: CCPO
I via Renante Socia Lada