Patay ang usa ka administrative officer sa Bohol Island State University (BISU)-Candijay Campus human makita ang iyang lawas nga gisulod sa sako sa Purok 4, Barangay Can-olin, Candijay, Bohol, kagahapon Hulyo 21, 2026.
Ang biktima giila sa kapulisan nga si Dexter “Dec” Hinayon, 33 anyos, nga duha ka adlaw nang gi-report nga missing sa wala pa siya makit-i. Sumala sa Bohol Provincial Police Office (BPPO), ang giingong suspek mao si Jessie Requiz, 18 anyos, usa ka first-year college student sa BISU ug giingong pag-umangkon sa pag-agawan sa biktima.
Nasayran usab sa imbestigasyon nga adunay personal nga relasyon ang duha, base sa mga mensahe nga nakuha sa cellphone sa biktima. Matod ni P/Major Joseph Lapena, spokesperson sa BPPO, nakita sa ilang imbestigasyon nga nagkita ang duha sa gabii sa Hulyo 19 sa usa ka mingaw nga lugar diin didto usab sa duol nakit-an ang lawas sa biktima.
Pinaagi sa mga mensahe sa ilang cellphone, dali nga natultolan sa kapulisan ang suspek ug nadakpan kini sa usa ka hot pursuit operation. Sa inisyal nga imbestigasyon, giingong nagkalalis ang duha tungod sa kwarta. Matod sa kapulisan, nasuko ang suspek kay ₱1,000 ra ang gihatag sa biktima imbes ₱2,000. Giingong gitook ang biktima, gibunalan og kahoy, gihigtan og tape ang iyang mga kamot, tiil ug dughan, dayon gisulod sa sako ug gibiyaan.
Giimbestigar usab sa kapulisan ang impormasyon nga ang suspek adunay pagkaadik sa online gambling nga “scatter” ug kanunay mangayo og kwarta sa biktima. Sa pagkakaron gihimo pa ang dugang imbestigasyon.
I via Renante Socia Lada