Malampuson ang hugot nga kampanya batok sa krimen nga gipasiugda sa Cebu City Police Office (CCPO) ilawom sa pagpangulo ni Acting City Director PCOL Enrico E. Figueroa. Sa tibuok bulan sa Enero 2025, nakadakop ang kapulisan og 558 ka mga suspetsado ug nakumpiska ang labaw sa ₱15.5 milyon nga kantidad sa gituohang iligal nga droga.
Sa gipahigayon nga mga anti-crime operations gikan Enero 1 hangtod 31, nakuha sa CCPO ang mosunod:₱15,599,540.00 nga balor sa gituohang iligal nga droga sa 175 ka simultaneous operations, pagdakop sa 256 ka tawo tungod sa iligal nga sugal ug pagkumpiska sa 36 ka loose firearms.
Gawas pa niini, 71 ka wanted persons ang nadakpan, nga nagpamatuod sa padayon nga paningkamot sa kapulisan sa pagpatuman sa balaod ug pagsiguro sa kalinaw ug kahapsay sa dakbayan, ilabi na sa umaabot nga Mayo 2025 National ug Local Elections.
Matud ni PCOL Figueroa, padayon ang ilang paningkamot sa pagpatuman sa kalinaw. Aron mahatagan ug kahapsay ug luwas nga kumunidad ang katawhan.
Sa pagkakaron nagpadayon ang gipahigayon nga operasyon sa CCPO aron mapugngan ang mga ilegal nga lihok ug masiguro ang kaluwasan sa publiko. (Renante Socia Lada)
(Source: CCPO)