Sa usa ka mahinungdanong lakang aron mapalig-on ang relasyon sa kapulisan ug komunidad, ug mahan-ay ang mga estratehiya sa pagpatuman sa balaod, mibisita si Police Regional Office 7 (PRO7) Director PBGen Redrico Maranan sa lalawigan sa Negros Oriental niadtong Pebrero 2, 2025.
Gipahigayon niya ang usa ka command conference nga gitambongan sa mga lokal nga opisyal sa kapulisan ug nagkadaiyang ahensya aron hisgutan ang mga isyu sa seguridad ug magtinabangay sa pagpatuman sa mga inisyatiba nga nagpalig-on sa public safety, disaster response, ug preparasyon alang sa umaabot nga National ug Local Elections sa Mayo 2025.
Ang maong panagtigom gipahigayon sa Negros Police Provincial Headquarters, Maringal Hall, Camp LtCol Francisco Fernandez Jr. sa Agan-an, Sibulan, ug nagsugod kini alas 1:30 sa hapon.
Sa iyang mensahe, gipasiugda ni PBGen Maranan ang panginahanglan sa aktibong community policing ug epektibong crime prevention strategies, nga usa ka yawe sa pagtukod og pagsalig ug kooperasyon tali sa kapulisan ug katawhan sa lalawigan.
Mitambong sa panagtigom ang mga opisyal sa kapulisan sa lalawigan, mga hepe sa munisipyo ug dakbayan, mga representante sa National Support Units, Provincial Election Officer, City Disaster Risk Reduction and Management Office sa Canlaon City, ug mga opisyal sa Armed Forces of the Philippines, Philippine Coast Guard, ug 302nd Brigade sa Philippine Army.
Gihisgutan ni PBGen Maranan ang mga nagpadayon nga programa aron matubag ang mga lokal nga hagit, lakip na ang kampanya batok sa ilegal nga drogas, pagpakgang sa mga organisadong krimen, ug pagpalambo sa emergency response sa mga katalagman. Gitugotan usab ang mga mitambong nga ipadayag ang ilang mga kasinatian ug panglantaw aron mas epektibo nga masulbad ang mga isyu sa ilang lugar.
“In alignment with our unwavering commitment to uphold the law, this visit not only underscores our vision of ‘Makabagong Pulis’ but also reinforces our collective responsibility for a safer and more secure Negros Oriental province, “segon ni PBGen Maranan.
Gawas sa maong panagtigom, gibisita usab ni PBGen Maranan ang mga pasilidad sa Negros Oriental Headquarters aron matan-aw kung andam ba ang kapulisan sa ilang mga katungdanan. Giawhag niya ang 200 ka dugang nga pulis gikan sa PRO7 nga magpabilin nga propesyonal ug matinud-anon sa ilang serbisyo, ilabi na sa pagpanalipod sa katawhan ug paghatag og humanitarian assistance sa mga residente sa Canlaon City. (Renante Socia Lada)
(Source: PRO7-PIO)