Nadakpan sa kapulisan ang 49 ka mga suspetsado nga gipangita sa balaod, lakip na ang 13 ka most wanted, human sa 24-oras nga kusog nga operasyon sa Police Regional Office 7 (PRO7) sa tibuok Central Visayas.
Matod ni PRO7 Regional Director PBGen Redrico A. Maranan, ang kalampusan sa operasyon tungod sa lig-on nga koordinasyon sa mga pulis, maayong pagpaniid, ug tabang gikan sa mga tawo nga nitug-an og impormasyon.
Gipahigayon ang operasyon gikan Hunyo 27 hangtod 28, 2025, sa lain-laing lugar sa rehiyon. Target sa mga pulis ang mga tawo nga adunay warrant of arrest tungod sa seryosong krimen. Ang 13 sa mga nadakpan dugay nang gipangita sa kapulisan.
Ingon ni PBGen Maranan, ang pagkadakop sa mga wanted nagpakita nga lig-on ang balaod sa Central Visayas ug dili makalikay ang mga kriminal sa hustisya.
Gipasalamatan usab sa PRO7 ang publiko sa ilang suporta ug kooperasyon. Ang mga nadakpan karon anaa na sa kustodiya sa kapulisan ug ipasaka sa korte para sa tukmang kaso.
Source: PRO7
I via Renante Socia Lada
#rpndykccebu