Hilak og pagbakho ang gibati sa mga ginikan human nila nakita ang ilang anak nga nakabsan sa kinabuhi tungod sa aksidenti sa kadalanan.
Nahitabo kini didto sa Provincial Road, Brgy. Papan, lungsod sa Sibonga, probinsya sa Sugbo, pasado alas 3:30 kagahapon sa hapon, Mayo 8, 2024.
Ang biktima giila sa Sibonga Police Station, nga mao si Felicity Suico Fernandez, 4 anyos ang panuigon, taga Barangay Basak, sa mao rang lungsod.
Naila usab ang suspetsado nga driver sa Van nga mao si Joel Camoro Regodon, 42 anyos ang panuigon,residenti sa Barangay Valladolid, siyudad sa Carcar.
Sa imbestigasyon nga gihimo sa Sibonga Police Station pinaagi sa ilang hepe nga si PCPT Fort Antony Valdez, nasayran nga nadasmagan ang biktima sa usa ka Mitsubishi L300 Van sa maong lugar.
Sa kakusog sa impact niini nakabsan gyud kini sa kinabuhi didto sa tambalanan bisan paman nga dali kining gitabang sa mga sakop sa Sibonga MDRRMO.
Sa pagkakaron padayong gitanggong ang suspetsado og giandam na usab ang kasong kalapasan sa Reckless Imprudence resulting to Homicide. (Renante Socia Lada)
(Source: Sibonga Police Station)