Kapin 3,215 ka mga panimalay sa Bogo City ang nakadawat og tabang gikan sa Cebu Provincial Government human ilang mga balay naguba tungod sa kusog nga linog nga miigo sa Northern Cebu niadtong Septembre 2025.
Ang maong ayuda nga mokabat sa ₱32.15 milyones gi-apod-apod kagahapon Miyerkules, Hunyo 3, 2026, ug personal nga gipanghatag ni Governor Pam Baricuatro. Kada benepisyaryo nakadawat og ₱10,000 cash ug 10 kilos nga bugas.
Sa iyang mensahe, giila sa gobernador ang paningkamot sa mga miyembro sa Provincial Board ilabi na si Board Member Tining Martinez sa pagtabang aron maaprubahan ang trust fund nga gigikanan sa pondo sa ayuda. Gisulti niya nga dugay na kini nga gi-awhag ug karon lang gyud natuman.
Gawas sa cash ug bugas, naghatag usab ang Kapitolyo og mga tabang sa panginabuhian sama sa mga liso sa gulay, calamansi seedlings, abono para sa mango, hybrid corn seeds, ug gamit sa pangisda. Nag-apod-apod usab og mga hayop sama sa carabao ug kanding para sa mga napili nga mag-uuma aron mapalambo ang ilang panginabuhian.
Mitambong usab sa maong kalihukan si Bogo City Mayor Mayel Martinez, Vice Mayor Carlo Martinez, Congressman Sun Shimura, ug mga Provincial Board Members nga sila Kerie Shimura ug Nelson Mondigo.
I via Renante Socia Lada