Gipirmahan ni Cebu Governor Pam S. Baricuatro ang Executive Order No. 31, Series of 2026, nga nagtukod og usa ka grupo sa probinsya nga motabang sa plano nga pagpauswag sa Camp Lapu-Lapu sa Visayas Command sa AFP.
Ang Camp Lapu-Lapu usa ka importante nga kampo sa militar kay didto nakabase ang Visayas Command sa Armed Forces of the Philippines. Kini makatabang sa seguridad, kaluwasan, ug tabang kung adunay kalamidad sa Visayas.
Ang bag-ong grupo gitawag og Provincial Technical Working Group (PTWG). Sila maoy makig-uban sa Department of National Defense (DND), AFP, ug uban pang ahensya sa gobyerno aron mahapsay ang mga plano ug proyekto sa kampo.
Ang ilang trabaho mao ang pagplano sa mga imprastraktura, pagtan-aw sa mga yuta, ug pagtabang sa koordinasyon sa mga proyekto nga ipatuman sa lugar.
Ang PTWG gilangkuban sa mga opisyal sa provincial government sama sa planning office, engineering, legal, disaster response, ug uban pa. Aduna pud mga miyembro gikan sa Provincial Board.
Sila mohatag og mga report ug rekomendasyon sa gobernador para masiguro nga hapsay ug tarong ang pag-uswag sa Camp Lapu-Lapu project. Ang order nagsugod dayon pagka-pirma niini.
I via Renante Socia Lada