Kapin 300 ka menor de edad ang naluwas sa nagkalain-laing lugar sa dakbayan sa Sugbo atol sa OPLAN BULABOG, usa ka operasyon sa Cebu City Police Office (CCPO) nga gitumong sa pagpalig-on sa kalinaw ug kahapsay sa komunidad.
Gipangulohan ni Acting City Director PCOL Enrico E. Figueroa, ang operasyon nagsugod sa gabii sa Pebrero 25 hangtod sa kadlawon sa Pebrero 26 nga gitambungan sa kapin 100 ka pulis gikan sa Police Stations 1 hangtod 11, apil ang mga special units.
Sa operasyon, 1,052 ka indibidwal ang nasusi, 328 ka menor de edad ang naluwas tungod sa curfew violations, ug 11 ka violation tickets ang na-isyu alang sa pagpanigarilyo sa pampublikong lugar, pag-inom og ilimnong makahubog, ug paglabay og basura. Dugang pa, upat ka mga sakyanan ang na-impound, samtang duha ka indibidwal ang nasikop sa Mambaling tungod sa ilegal nga drogas nga nakit-an diha mismo sa operasyon.
Sumala ni Police Regional Office 7 Regional Director PBGEN Redrico A. Maranan, gipakusgan sa CCPO ang ilang presensya sa komunidad aron mapadali ang paglikay sa krimen ug masiguro ang kahapsay sa siyudad. Ang pakigtambayayong sa lokal nga kagamhanan sa Cebu City usa usab ka dakong lakang aron mas epektibo ang ilang crime prevention strategies.
Ang CCPO padayon nga maningkamot sa pagpalig-on sa kaluwasan sa katawhan pinaagi sa mas lig-on nga presensya sa kapulisan.
Source: CCPO
I via Renante Socia Lada