Nadakpan na sa kapulisan ang tulo ka suspetsado nga giingong responsable sa pagpanulis ug pagpamusil patay sa tigpautang og kwarta nga si Michael Martus, 51 anyos, didto sa Barangay Pangdan, Dakbayan sa Naga, niadtong Septiyembre 2.
Ang mga dinakpan mao si Ronald Tano Larazan, 49 anyos, nga giila sa kapulisan nga mastermind sa krimen; si Jumar Papasin Abella, 32; ug ang pag-umangkon ni Abella nga si Sherwin Algarme Lascuña, 20 anyos, nga maoy unang nitug-an sa mga otoridad sa tinuod nga nahitabo.
Base sa imbestigasyon, nasuko si Larazan kay wala na siya gitugotan sa biktima nga makarenew sa iyang utang. Tungod niini, nagplano siya ug dautang buhat batok kang Martus.
Gikumpirmar usab nga gikuha sa mga suspetsado ang kapin ₱100,000 ug pila ka alahas gikan sa biktima human sa pagpamusil.
Samtang, giatubang karon sa tulo ka suspetsado ang kasong robbery with homicide. Posible usab nga mahimong state witness si Lascuña tungod sa iyang pagtug-an sa kapulisan.
Padayon ang kapulisan sa pagkuha og dugang ebidensya aron makompleto ang kaso batok sa mga suspetsado ug masiguro ang hustisya alang sa biktima.
I via Renante Socia Lada