Dako ang kadaot sa suplay sa ilegal nga drogas sa rehiyon human madakpan ang 25 ka mga drug lord ug nasakmit ang kapin ₱307 milyon nga kantidad sa shabu gikan Enero hangtod Mayo 2025.
Base sa report, sa 25 ka nadakpan nga suspek, 10 niini nadakpan sa Mandaue City, 7 sa Bohol, 6 sa Cebu City, 1 sa Lapu-Lapu City, ug 1 sa lalawigan sa Cebu. Gikonsiderar kini nga mga tawo nga dagkong supplier sa ilegal nga drogas sa rehiyon.
Matod ni Police Brigadier General Redrico A. Maranan, Regional Director sa PRO-7, kini nga mga drug lord mao ang punoan sa drug trade. Pinaagi sa pagpukan kanila nakaminos namimos ang suplay sa drugas sa kumunidad.
Gipasalig usab ni PBGEN Maranan ang dakong tabang sa publiko sa ilang operasyon. Nagpasalamat siya sa mga tawo nga mitug-an og husto ug tukmang impormasyon nga nakatabang sa pagkadakop sa mga suspek.
Gihangyo usab niya ang publiko nga ipadayon ang kooperasyon pinaagi sa pagsumbong sa mga kadudahang kalihokan sa labing duol nga police station o pagtawag sa 911. Giingon niyang mas epektibo ang kampanya kontra drogas kung magkahiusa ang kapulisan ug katawhan.
Source: PRO7
I via Renante Socia Lada