Sa padayon nga paningkamot sa kapulisan nga masiguro ang hapsay ug luwas nga katilingban, ang Guadalupe Police Station 9, pinangulohan ni PMAJ MILES B. DAMOSLOG, nagpatuman sa One-Time-Big-Time OPLAN KATOK niadtong Marso 13-14, 2025.
Ang maong operasyon nakakuha og 21 ka nagkalain-laing kalibre sa armas nga boluntaryong gisurender alang sa safekeeping.
Gipadangat kini sa mga tag-iya nga wala pa makakompleto sa ilang firearm registration, subay sa kampanya sa PNP OPLAN KATOK nga nag-awhag sa mga indibidwal ug organisasyon nga adunay armas nga iparehistro.
Ang mga pusil gikuha, gisiguro, ug gi-process sa Guadalupe Police Station 9, CCPO, alang sa husto nga dokumentasyon ug disposisyon samtang nagpadayon ang proseso sa pag-renew sa lisensya sa usa ka security agency.
Kini nga operasyon usa ka timailhan sa proaktibong pagpatuman sa balaod sa Cebu City Police Office (CCPO) aron malikayan nga magamit ang mga armas sa kriminalidad, labi na nga nagkadool na ang NLE 2025.
Matod ni CCPO Acting City Director PCOL ENRICO E. FIGUEROA, ang OPLAN KATOK dako og gikatabang sa siguridad sa komunidad pinaagi sa maayong pagmonitor sa mga pusil nga wala na proseso ang lisensya ug pagpasiugda sa husto nga pagpanag-iya sa armas.
Kini nga programa nagsubay sa mando sa Police Regional Office 7 Regional Director, PBGEN REDRICO A. MARANAN, nga nagpalig-on sa mga inisyatiba alang sa siguridad sa katawhan ug pagpugong sa krimen. (Renante Socia Lada)
(Source: CCPO)