Usa ka 21-anyos nga tinun-an sa kolehiyo ang gilabtan sa iyang silingan atol sa Pasko Disyembre 25, 2024, sa Sitio Mansanitas, Barangay Inayawan, Dakbayan sa Sugbo.
Sumala sa Inayawan Police Station, ang biktima nisumbong nga abi niya og ang iyang kapuyo ang nihilabot kaniya tungod sa kahayag nga “dimlight” sa ilang balay. Nakasabot ra siya nga lahi na diay ang nipatong kaniya human niya maklaro ang nawong sa suspek nga iyang silingan nga si alias “Kerwin”, 25 anyos.
Matod ni Police Lieutenant Christian Darcy Fat, hepe sa Inayawan Police Station, ang biktima ug suspek silingan ug nagluyo ra ang ilang mga balay. Gisundan sa suspek ang biktima ngadto sa iyang balay ug nahitabo ang insidente samtang natulog kini.
Ang suspek nangatarungan nga ang iyang gibuhat resulta sa kahubog tungod sa sagol nga mga ilimnon sa ilang pasko nga selebrasyon.
Ang biktima nakamata ug nakabantay nga lahi na ang nipatong kaniya, maong iyang giwakli ang suspek.
Nisumbong dayon siya sa iyang kapuyo nga nag-inom pa atubangan sa balay, hinungdan nga gikonprontar nila uban sa uban pang mga silingan ang suspek.
Niresponde ang barangay tanod ug kapulisan, ug gidakop ang suspek nga usa ka construction worker.
Giandam na ang kasong pagpanglugos o rape batok sa suspek, samtang kini anaa sa kustodiya sa Inayawan Police Station.
Ang mga awtoridad nagdasig sa publiko nga magpabiling mabinantayon ug mo taho dayon sa mga otoridad kung adunay susamang insidente aron makab-ot ang hustisya.
📸 CTTO
I via Renante Socia Lada