Balhog sa prisuhan ang duha ka suspek sa pagpamaligya og ilegal nga drogas ang nadakpan sa gipahigayon nga anti-drug operation sa Barangay Basak, Lapu-Lapu City niadtong Hunyo 12, 2025. Kapin sa 515 gramos sa gituohang shabu ang nakumpiskar sa operasyon, nga gibana-banang mobalor og ₱3.5 milyon.
Gipasiugdahan ang operasyon sa City Drug Enforcement Unit (CDEU), City Intelligence Unit (CIU), ug Mobile Patrol Unit sa Lapu-Lapu City Police Office (LCPO). Ang mga dinakpan kasamtangang gitanggong sa LCPO custodial facility samtang giandam na ang mga kasong ipasaka batok kanila ilawom sa Republic Act 9165 o Comprehensive Dangerous Drugs Act of 2002.
Gidayeg ni Police Brigadier General Redrico A. Maranan, Regional Director sa PRO-7, ang mga sakop sa operasyon sa ilang padayon nga paningkamot batok sa ilegal nga drogas. Matod niya, ang ilang hugot nga operasyon kabahin sa paningkamot sa PNP ilawom sa mando ni Chief PNP PGen Nicolas D. Torre aron wagtangon ang mga drug network sa rehiyon.
Pinasidunggan usab sa kapulisan ang suporta sa katawhan ug ilang gilauman nga padayon nga kooperasyon aron masiguro ang kaluwasan ug kahapsay sa komunidad batok sa hulga sa drogas.
Source: PRO7
I via Renante Socia Lada