Usa ka 18-anyos nga babaye nga giila lang sa alyas nga “Marie” ang nadakpan sa usa ka joint buy-bust operation sa Sitio Maharlika, Barangay Tipolo, Mandaue City, pasado alas-12:30 sa kadlawon, Hulyo 11, 2025.
Ang operasyon gipahigayon sa hiniusang pwersa sa City Intelligence Unit (CIU) ug Cebu City Drug Enforcement Unit (CDEU) sa Mandaue City Police Office (MCPO), Regional Intelligence Division 7 (RID7), Philippine Drug Enforcement Group 7 (PDEG7), ug PDEA Regional Office 7.
Gikompirmar sa kapulisan nga si “Marie”, usa ka residente sa Barangay Sawang Calero, Cebu City, High-Value Individual (HVI), ug single, ang ilang target sa maong operasyon.
Nakuha gikan kaniya ang gibana-bana nga tulo ka kilo nga gituhuang shabu nga nagkantidad og labaw pa sa ₱20.4 milyon ang street value.
Gisiguro sa mga otoridad nga nasayran ni “Marie” ang iyang mga katungod ug ang kamahinungdan sa iyang pagkadakop, gamit ang pinulongan nga kasabot siya.
Nagpadayon karon ang imbentaryo ug dokumentasyon sa mga ebidensya samtang gipahimutang na sa kustodiya ang suspetsado alang sa pagsang-at sa kasong kalapasan sa Seksyon 5 ug 11, Artikulo II sa Republic Act 9165 o ang Comprehensive Dangerous Drugs Act of 2002.
I via Renante Socia Lada