Malampuson nga nakab-ot sa Cebu City Police Office (CCPO) ang 100% crime clearance efficiency rate ug usa ka dako nga 32.71% nga pagkunhod sa mga krimen sa unang unom ka bulan sa tuig 2025. Ang maong kalampusan usa ka dakong kalambuan alang sa kapulisan ilawom sa liderato ni Acting City Director PCOL Enrico E. Figueroa ug sa lig-on nga suporta sa katawhan, lokal nga kagamhanan, ug partner agencies.
Base sa datos gikan Enero hangtod Hunyo 2025, mikunhod ang kinatibuk-ang ihap sa 8 focus crimes sama sa pagpatay, pagpangawat, pagpanglugos, ug carnapping kon itandi sa parehas nga hugna niadtong 2024. Gikan sa 428 ka kaso kaniadtong 2024, nahimong 288 na lang kini karong tuiga.
Ang pipila sa mga nag-unang krimen nga nasinati og dako nga pagkunhod mao ang: pagpatay (gikan 36 ngadto sa 27 ka kaso), physical injury (gikan 93 ngadto sa 50), pagpangawat (gikan 206 ngadto sa 146), ug robbery (gikan 48 ngadto sa 23). Ang kaso sa motorcycle carnapping miubos gikan 15 ngadto sa 8. Samtang ang kaso sa rape mitaas gamay gikan 28 ngadto sa 32 ug ang homicide nagpabiling 2.
Ang maong kalampusan gipasidunggan sa maayong pagpanguna sa CCPO, lig-on nga partisipasyon sa komunidad, epektibong mga operasyon, ug hugot nga kooperasyon sa interagency coordination. Ang Criminal Investigation and Detection Unit (CIDU) usab adunay dakong papel sa pagkab-ot sa 100% nga clearance rate.
Lain pang epektibo nga mga lakang mao ang regular nga night patrols, Oplan Bulabog, ug padayong checkpoints nga nakapakunhod sa oportunidad sa mga krimen ug nakapadali sa pagresponde sa mga insidente. Mas gipadako usab ang police visibility ug gipakusog ang mga community engagements.
Niadtong Hulyo 9, 2025, gipasiugdahan usab pag-usab ang Oplan Pakigsandurot sa Barangay Luz, uban ang suporta ni Mayor Nestor Archival. Ang programa nagtumong sa pagpalig-on sa relasyon tali sa kapulisan ug katawhan, ug paghatag og mga serbisyo publiko samtang gi-awhag ang partisipanti.
Source: CCPO
I via Renante Socia Lada