Gironda sa kapulisan ang 15 ka illegal gun-making sites sa Danao City atol sa usa ka dako nga operasyon kagahapong adlawa, Martes, Mayo 20, 2025, isip kabahin sa padayon nga kampanya sa Police Regional Office 7 (PRO-7) batok sa mga loose firearms.
Gisumpo sa mga otoridad ang maong mga pabrika, diin nadakpan ang walo ka mga suspek, samtang usa pa ka indibidwal ang mitahan ngadto sa kapulisan. Nakuha sa operasyon ang daghang mga hinimo na nga armas, mga parte sa pusil, ug mga kagamitan sa paghimo niini.
PRO-7 Regional Director PBGen. Redrico Maranan nipadayag nga dili lang lokal nga mga kriminal ang kliyente sa maong mga ilegal nga pabrika, kundili apil na ang mga internasyonal nga grupo nga posibleng naggamit sa mga armas alang sa krimen ug terorismo.
Narekober sa mga operatiba ang mga sumusunod:
Mga pistola ug rifle nga fully assembled.
Mga gun parts sama sa barrel, trigger, ug magazine.
Mga power tools ug gamit sa armas fabrication.
Posibleng listahan sa mga suki ug dokumento gisusi na sa Police Regional Office 7.
Sumala sa PRO-7, ang operasyon nahimong posible pinaagi sa dugay nga surveillance ug intelligence gathering, nga gisuportahan sa local PNP ug mga special units.
Gipasakaan og kaso ang mga nadakpan nga suspect ilawom sa Republic Act 10591 o ang Comprehensive Firearms and Ammunition Regulation Act.
Segon ni PBGen. Maranan nga ang maong kalampusan kabahin sa ilang daghang operasyon batok sa illegal gun manufacturing. Gi-awhag usab ang kooperasyon sa publiko kalabot sa ilegal nga paghimo og armas.
Padayon ang kampanya sa PRO-7 aron mapugngan ang pagkatag sa mga pusil nga walay ligal nga papeles ug malikayan ang posibling kagubot sa Central Visayas.
I via Renante Socia Lada