Sulod sa upat ka adlaw nga gipalig-on nga operasyon batok sa kriminalidad, nakadakop ang Cebu Police Provincial Office (CPPO) og 119 ka mga tawo nga nalambigit sa lainlaing kalapasan ug nakakompiskar og hapit ₱1 milyon nga kantidad sa gidudahang shabu. Ang mga operasyon gihimo gikan sa Hunyo 5 hangtod Hunyo 8, 2026 sa nagkalainlaing bahin sa lalawigan sa Sugbo.
Sa kampanya batok sa ilegal nga drogas, 61 ka drug personalities ang nadakpan pinaagi sa 48 ka operasyon. Lakip niini ang 58 ka gidudahang namaligya ug tulo ka gidudahang tiggamitan sa ilegal nga drogas. Narekober usab sa kapulisan ang 140.98 gramos nga gidudahang shabu nga adunay kantidad nga ₱958,664.
Padayon usab nga gipakusgan sa kapulisan ang ilang manhunt operations diin 24 ka wanted persons ang nadakpan pinaagi sa 25 ka operasyon. Lakip sa mga nadakpan ang lima ka Most Wanted Persons. Usa usab ka tawo nga adunay outstanding warrant sa Alcantara ang nahibal-an nga namatay na.
Sa operasyon batok sa ilegal nga armas, 14 ka mga tawo ang nadakpan ug 14 ka loose firearms ang nakompiskar. Dugang pa, 19 ka armas ang boluntaryong gitugyan sa mga tag-iya ngadto sa kapulisan, samtang usa ka lisensyadong armas nga paso na ang rehistro gitugyan alang sa safekeeping. Sa kampanya batok sa ilegal nga sugal, 20 ka tawo usab ang nadakpan ug ₱3,620 nga pusta ang nakumpiskar.
Matod ni CPPO Provincial Director PCOL Abubakar Udang Mangelen Jr., ang kalampusan sa mga operasyon nagpakita sa lig-on nga paningkamot sa kapulisan sa pagpanalipod sa katawhan. Gidayeg usab ni PRO-7 Regional Director PBGEN Arnold Evangelista Abad ug Cebu Governor Pamela Baricuatro ang mga nahimo sa CPPO ug ilang gi-awhag ang publiko nga magpadayon sa pakigtambayayong aron mapadayon ang kalinaw ug kahapsay sa lalawigan sa Sugbo.
I via Renante Socia Lada