Nagpagawas og kapin ₱1 milyon nga pinansyal nga tabang ang Probinsyal nga Gobyerno sa Cebu alang sa napiling 10 ka barangay sa ikatulo ug ikapito nga distrito. Ang kantidad nga ₱1,010,000 gitumong aron suportahan ang lain-laing proyekto sa imprastraktura ug mga kalihokan pang-sosyokultural sa mga komunidad.
Sumala sa kapitolyo, kabahin kini sa ilang padayon nga paningkamot sa pagpalig-on sa grassroots development ug sa pagpalambo sa mas luwas ug disiplinadong komunidad ubos sa mga programa sa nasudnong gobyerno.
Personal nga gitunol ni Gobernador Pamela Baricuatro ang mga tseke ngadto sa mga kapitan sa barangay. Gipasabot usab niya ang kamahinungdanon sa seryosong pagsunod sa “Safer Cities” initiative sa Department of the Interior and Local Government (DILG), nga nagtumong sa pagpalig-on sa seguridad ug disiplina sa komunidad pinaagi sa hugot nga implementasyon sa mga ordinansa ug dugang presensya sa kapulisan sa mga lugar nga daghan og tawo.
Apil sa programa ang paglimit sa pag-inom sa publiko, pagdili sa paglakaw nga walay sapot sa ibabaw sa lawas, pagkontrol sa saba nga videoke, ug pagpatuman sa curfew alang sa mga menor de edad.
Miingon ang gobernador, “Kita sa barangay, mosunod lang ta sa DILG guidelines.”
Sa ikatulong distrito, ang mga barangay nga nakadawat og ayuda mao ang Bairan sa Asturias ug Mag-antoy sa Tuburan nga nakadawat og ₱200,000 matag usa, samtang ang Aliwanay sa Balamban nakadawat og ₱300,000. Ang ubang nakabenepisyo mao ang Sumon, Amatugan, ug Tominjao sa Tuburan, Vito sa Barili, ug Bagakay sa Toledo City nga nakadawat og nagkalain-laing kantidad.
Sa ikapito nga distrito, nakadawat usab og ₱50,000 matag usa ang Barangay Balabagon sa Moalboal ug Barangay Doldol sa Dumanjug.
Gilauman sa kapitolyo nga ang maong tabang makatabang sa mga barangay sa pagpatuman sa ilang prayoridad nga proyekto ug sa pagpaayo sa mga batakang serbisyo alang sa ilang mga residente.
Source: Cebu Province PIO
I via Renante Socia Lada