I-update sa Cagayan de Oro City Hall karong semanaha ang pipila ka mga probisyon sa Comprehensive Land Use Plan (CLUP) niini aron maapil ang mga dagkong kalamboan sa urban district sa dakbayan.
Kini human sa tigom niadtong Biyernes (Ene. 24) tali sa City Planning and Development Office (CPDO) ug pipila ka department managers sa City Hall uban sa mga representante sa nasudnong ahensya sa gobyerno ug Land Use Committee sa Regional Development Council (RDC-10). sa usa sa mga hotel sa siyudad.
Si Regional Director Mylah Faye Cariño sa National Economic Development Authority (NEDA-10) niingon nga adunay nagpadayon nga plano nga magtukod og sentro sa gobyerno sa amihanang Mindanao duol sa tugpahanan sa Laguindingan. Siya miingon nga daghang mga opisina sa gobyerno ang ibalhin didto sa pagpaabot sa pagkuha sa Aboitiz InfraCapital Inc. sa pagdumala ug operasyon sa tugpahanan karong tuiga.
Gitumbok usab ni Cariño ang P2.5 bilyones nga joint venture agreement nga gipirmahan tali sa Kapitolyo Probinsyal sa Misamis Oriental ug developer A. Brown Co. Inc nga himuong mixed use complex ang bahin sa compound sa Kapitolyo. Siya niingon nga kini nga kalambuan uban sa relokasyon sa pipila ka mga buhatan sa gobyerno ngadto sa probinsiya makatabang sa pag-decongest sa sentro sa negosyo sa Cagayan de Oro City.
Atol sa tigom, si Cariño nanawagan og workshop tali sa CPDO ug pipila ka mga departamento sa City Hall uban sa mga representante sa Department of Human Settlements and Urban Development (DHSUD) aron iapil ang mga sugyot sa pag-update sa mga development plans alang sa central business district sa dakbayan. Siya miingon nga sila naglaum nga ang City Hall mahimong ma-maximize ang paggamit sa mga lugar alang sa kapuy-an nga mga luna ug komersyal nga paggamit, ug uban pa.
(CIO)