Adunay igong supply sa karneng baboy ang dakbayan sa Cagayan de Oro.
Mao kini ang nasuta ni konsehal George Goking human gituki atol sa tigom sa komite sa trade & commerce sa milabayng adlaw ang problema sa pagsaka sa presyo sa karne sa baboy, manok ug uban pang agricultural products dinhi sa syudad.
Matod ni Goking nga taas kaayo ang pagsaka sa presyo mao nga kinahanglan nga mamonitor ang pagsaka sa maong mga presyo kay dako kaayo kini nga problema sa katawhan ug sa mga konsumedor.
Niini, si Atty. Egay Uy sa Joint Inspection Team (JIT) namahayag nga artificial lamang ang maong pagtaas sa presyo kay gani ang Northern Mindanao naka-supply pa man sa ubang rehiyon.
Sa ilang bahin, ang representante sa Department of Agriculture (DA)mibutyag nga ang supply sa karneng baboy anaa sa 600%.
Dugang pa, si Atty. Uy miingon nga ang buhatan sa DTI padayon nga misusi sa presyo sa mga groceries samtang ang DA ang padayong nagmatikod sa presyo sa mga fresh product.
Dugang gibutyag nga adunay gilaraw nga storage facility ang dakbayan alang sa mga agricultural products aron mapugngan usab ug mapreserbar ang mga produkto ilabina ang mga gulay nga dali malata.
Si konsehal Goking mipasabot nga kinahanglan lamang ang pagsuporta sa matag usa aron maprotektahan ang mga konsumante ug ang mga negosyante. (SP)