Balor sa 2.3 milyones pesos nga tabang sa lokal nga kagamhanan sa Cagayan de Oro ang itunol ngadto sa mga biktima sa sunod-sunod nga linog sa North ug South Cotabato. Kini tapos aprobahi sa konseho ning dakbayan ang resolusyon nga nagtugot kang Mayor Oscar Moreno paggamit sa 2 milyones pesos nga calamity funds alang sa maong katuyuan.
Maoy nangamahan sa pagsang-at resolusyon ang committee sa social services nga gipamunuan ni konsehal Girlie Balaba. Matud ni Balaba mag-agad na lamang sila sa mando sa mayor kon ang tabang nga itunol ipaagiba sa cash o relief goods nga pagadalhon sa maong dapit.
Nasayran nga nag-amot-amot usab ang mga kawani sa cityhall nga moabot tulo ka libo kapin sa tag-usa ka gatus pesos gikan sa ilang dawaton nga bonus nga madawatan karong bulana, hinungdan nga mosumada tanan sa P2.3 milyones ang matunol nga hinabang ngadto sa mga biktima.