Davao City – Nadakpan ang usa ka call center agent atol sa gipahiayong anti-illegal drugs operation (buy bust) sa mga otoridad alas 3:27 sa hapon niadtong Miyerkules, Setyembre 14 ning kasamtangang tuig.
Giila ang dakpan nga si Dunhill Hassan Balda-on Peralta, alyas Danhill, 22 anyos, ulitawo, usa ka call center agent ug residente sa Buhangin ning siyudad sa dabaw.
Ang maong operasyon gilusad sa mga ginsakpan sa San Pedro Police Station Drug Enforcement Team (SDET) sa pagpanguna ni Station Commander PMAJ Jack Leon Tilcag uban sa mga personahe sa Philippine Drug Enforcement Agency (PDEA) 11-DCO pagpanguna ni Intelligence Agent-5 Jenalyn Tan.
Naaktuhan ang suspek nga nagbaligya ug usa ka sachet nga gikasuspetsahang shabu ngadto sa usa ka pulis nga nagpaka-aron-ingong poseur buyer bugti sa ₱ 1,000.00 nga buy bust marked money. Nakuha usab gikan sa dinakapan ang usa ka android cellular phone nga gigamit niini sa iligal nga transaksyon sa druga.
Balhog na karon ang dinakpan sa selda sa San Pedro Police Station samtang gihuptan na usab sa mga otoridad ang mga ebidensya nga nakumpiska. Kaso’ng kalapasan sa Section 5 sa Republic Act 9165 atubangon sa dinakpan.
(Source: San Pedro Police Station)