Sa tinguha nga diretsong matubag ug maaksyonan ang mga hangyo ug problema sa katawhan, mokabat 20 ka mga buhatan sa city hall ang miapil sa People’s Day ni Mayor Rolando `Klarex’ Uy nga gipahigayon sa city hall quadrangle, Miyerkules, Enero 11, 2022.
Una nang gipahibalo ni Mayor Klarex nga sukwahi sa naandan nga sa iyang buhatan himoon ang People’s Day, ibalhin niya kini sa mas luag nga lugar aron patas nga iyang masinati ang gibati usab sa katawhan nga magpaabot kanus-a makasulod sa iyang opisina.
Tulo sa mga buhatan nga miapil mao ang Roads and Traffic Administration (RTA), City Housing & Urban Development Department (CHUDD), ug City Economic Enterprise Business Development Administration (CEEBDA).
Pipila lamang kini sa mga buhatan nga kasagaran adtoan sa katawhan.
Samtang gatusan ka tawo ang gilauman nga maatiman ni Mayor Klarex ning unang adlaw ug unang higayon nga sa gawas sa iyang buhatan gipahigayon sa mayor ang People’s Day.
(Source: CIO-Cagayan de Oro, photo courtesy by Jay Arancon)