Ipatuman sa syudad basi sa Executive Order No. 159-2022 A nga gipirmahan ni Mayor Rolando `Klarex’ Uy ang temporary traffic scheme alayon sa kasaulogan sa kapistahan sa Black Nazarene karong adlaw’ng Lunes, Enero 9, 2023.
Ang temporary traffic scheme maglangkob sa ruta sa pagbalhin sa Black Nazarene gikan sa Nazareno Parish Church paingon sa St. Augustine Cathedral ug pag-vigil sugod sa alas 10:00 sa gabii sa Enero 8 hangtod sa alas 4:00 sa buntag sa Enero 9.
Magsugod ang ‘Traslacion’ sa Itum nga Nazareno pagka ala-6:00 sa buntag gikan sa Cathedral balik na usab sa Nazareno Parish.
Nunot niini, adunay temporaryo nga pagsira sa mga dalan atol sa vigil ug ‘Traslacion’, lakip ang pagpatuman sa temporary rerouting sa mga pribado ug public utility vehicles ug uban pa nga mga gabayan ug regulasyon.
Alayon niini, gihangyo ni Mayor Klarex ang igong pagsabot sa mga motorista ug ang katawhan ingon man sa pagsunod sa mga regulasyon ug gabayan.
(Source: CIO – Cagayan de Oro, infographics: RTA – Cagayan de Oro)