Gihatagan karon og taas nga higayon nga maka-renew sa ilang business permit ang mga stallholders sa kamerkaduhan ning syudad basi sa City Ordinance No. 2023-129 nga giaprobahan sa 20th City Council bag-ohay lang.
Ang lugway nagsugod sa Marso 1-30, 2023, diin walay penalty o’ multa nga pagabayaran ang mga stallholders.
Gibutyag ni Marfe Dacoco, Department Manager sa City Economic Enterprises & Business Development Administration (CEEBDA), nga moabot na sa 1,149 stallholders ang naka-renew sa ilang business permit sumala sa record sa buhatan niadtong Pebrero 27, 2023.
Nasayran nga adunay 3,882 stallholders sa kamerkaduhan ning syudad ug kini naglangkob na sa Cogon, 2,462; Carmen, 913; Puerto, 57, ug Bulua, 450.
Alayon niini, giawhag ni Dacoco ang tanang vendors sa kamerkaduhan nga pahimuslan kini nga lugway sa pag-renew sa ilang business permit aron padayon usab nilang mapahimuslan ang benepisyo sa pagpadagan sa usa ka lehitimong negosyo.
(Source: CIO-CDO, photo courtesy of CEEBDA)