Hugot nga nagpatuman ang buhatan sa Provincial Veterinary Office (PROVET) sa mga lakang ug gabayan aron nga mapanalipdan ang lalawigan sa makapatay nga sakit sa mga binuhing baboy nga mao ang African Swine Fever (ASF).
Tungod sa maong mga lakang, wala nay mga natala nga mga bag-ong kaso sa ASF sa probinsya sulod sa duha na ka semana nga gitaho ni Dr. Benjamin Resma sa sinemanang pagpakayab sa nasudnong bandila sa Kapitolyo Probinsyal.
Nagpabilin ang Munisipyo sa Laguindingan nga adunay pinakataas nga adlaw nga walay natala nga kaso sa ASF nga muabot na sa 200 ka adlaw samtang ang Munisipyo sa Gitagum ang adunay pinakamubo nga natala sa ASF sulod sa 17 ka adlaw.
Ug mao kini ang mga datos ug ihap sa mga adlaw sa mga Munisipyo ug Dakbayan sa Probinsya nga nakatala sa ASF: EL Salvador, Alubijid ug Opol -137, Balingaon -93, Libertad -92, Gingoog City ug Villanueva -90, Sugbongcogon ug Talisayan -83, Jasaan ug Balingasag -74, Salay -62, Tagoloan, Manticao ug Lugait -59, Lagonglong -45, ug Initao -38.
Apan taliwala sa nagpadayon nga pag-ubos sa kaso sa ASF walay puas sa pagpahimangno si Dr. Resma sa tanan hilabina ang mga hog raisers nga dili gihapon magkumpyansa gumikan kay anaa gihapon ang nasangpit nga virus sa lalawigan.
Ning nagpadayon ang pagpakigbatok sa tanan hilabi na sa PROVET sa ASF, nagpadayon usab ang mga inisyatiba sa buhatan aron mapugngan ang pagkuyanap sa makapatay nga sakit sa mga binuhing baboy aron sa dili madugay, manumbalik na ang kaniadtong kahimsog sa industriya sa baboy sa probinsya.
(Source: PVET-MISOR | Misamis Oriental Provincial Information Office Facebook page)
