Human gipasabot kalabot sa ilang sitwasyon diin nakasulod sila sa road-right-of-way ug kinahanglan nga sila mohawa, boluntaryo nga miguba sa ilang mga istraktura ang mga informal settler families kon ISFs sa dalan V. Castro, Barangay Carmen ning syudad.
Nasayran nga gihinabi sa syudad ubos sa administrasyon ni Mayor Rolando `Klarex’ Uy pinaagi sa Task Group Demolition, City Housing and Urban Development Department (CHUDD), ug sa mga opisyales sa Brgy. Carmen, pinangulohan ni Punong Barangay Lorna Uy, ang mga apektadong pamilya niadtong Mayo 5, 2023.
Sila gipasabot nga obligasyon sa syudad nga sundon ang kamandoan sa Department of Interior and Local Government (DILG) pinaagi sa Memorandum Circular No. 2022-085 kalabot sa Road Clearing in the New Normal, ug nahimo usab kini nga operational pinaagi sa Executive Order No. 024-2023 nga gipagawas ni Mayor Klarex Uy niadtong Enero 30, 2023.
Gani, gisunod gihapon sa TG Demolition ang proseso sa pag-demolish nga mao ang paghatag og notice ngadto sa mga apektadong pamilya aron ipahibalo kanila nga kinahanglan na silang mobalhin sa gitakdang adlaw ug petsa.
Niadtong adlaw’ng Martes, Mayo 16, 2023, boluntaryo nga giguba sa mga apektadong pamilya ang ilang mga istraktura, hinungdan nga mapasalamaton ang syudad pinaagi sa TG Demolition sa mga pamilya nga nakasabot sa sitwasyon nga mohawa sila sa ilang kabubut-on.
(News from OBO/CIO CDO, photo courtesy of TG Demolition Team)