Dako ang pagsalig ug kumpiyansa ni Mayor Rolando ‘Klarex’ Uy sa Covid-19 Emergency Operations Center kon EOC nga masustenir niini ang paningkamot sa syudad nga maproteksyonan ang publiko batok sa virus.
Kini human gihatagan og panugot ni Mayor Klarex ang health cluster sa EOC nga padayonon ang Covid-19 press briefing matag adlaw’ng Lunes, sugod alas 10:00 hangtud alas-11:00 sa buntag.
Gani man, nakigtagbo ang mayor kang City Health Officer Dr. Rachel Dilla, CHO chief epidemiologist Dr. Joselito Retuya, CHO spokesperson Dr. Ted Yu ug Dr. Ina Grace Chiu, vaccination program coordinator sa CHO, sa wala pa gisugdan ang press briefing niadtong Lunes sa city hall.
Si Mayor Klarex namahayag nga hingusgan pa sa iyang administrasyon ang pakig-abag sa Department of Health ug uban pang ahensya sa gobyerno, ilabina sa pagpamakuna tungod kay mao ra kini ang bugtong panagang sa katawhan batok sa virus, gawas sa pagsunod sa minimum public health standards.
Busa gihangyo sa mayor ang hugot nga kooperasyon sa katawhan aron mahibalik na sa ‘new normal’ ang dakbayan sa Cagayan de Oro, ug usab makabangon og balik ang ekonomiya sa syudad nga nahugno tungod sa pandemya.
Source: CIO