Tungod sa dakong pagsalig ug suporta sa Dansolihon Tribal Council sa administrasyon ni Mayor Rolando “Klarex” Uy, gidugangan pa niini ang luna nga ilang gihatag sa syudad alang sa katukoran sa city college sa Brgy. Dansolihon.
Sa pagdala sa “Klarex nga Serbisyo sa Baryo” sa Brgy. Dansolihon niadtong Sabado, Pebrero 25, gi-anunsyo ni Mayor Klarex, kauban ang presensya sa mga datu, ang dugang 14 ka ektarya sa una nang 46 ektarya nga gihatag sa tribal council nagdto sa syudad alang sa city college.
Tungod niini, dako ang pasalamat ni Mayor Klarex sa pag-abag ug kooperasyon sa tribal council aron matuman ang iyang damgo nga kalamboan sa edukasyon sa syudad.
“Garbo nako nga wala nila gihikaw nga matukod ang damgo nga city college ug tungod niini dako kaayo ang akong pasalamat kaninyo mga datu,” saysay sa mayor.
Kahinumdoman nga una nang gipadayag ni Mayor Klarex ang pagpili sa Brgy Dansolihon nga tukoran sa Cagayan de Oro City College.
(News & photo courtesy of Cagayan de Oro – CIO)